Tumetesing Kabar

Kembang-kembang Adenium

Dening: Joko HN, Surabaya  2008

 

saben esuk, disawang

yen awan cahyane srengenge ora kurang

wayah sore, dielus-elus kembange

ibo endahe ya urip iki

 

wengi, cahyane lintang sumilat

kembang-kembang adenium tambah eseme

rasane kaya ngawe-awe, aja turu disik

ayo ngeling-eling lelakon bebarengan.

 

nanging raga wis ora kuat

sedina muput mung bingung golek upa

lali sapa sing nandur kembang

lali sapa sejatine awake dewe

 

nalikane terompet maut keprungu

kembang-kembang adenium dadi layu

luh tumetes saka mripat kang nyawang

lan, ora ana sing bakal ngancani maneh.

 

 ——————————————-

 

Malem Ganjil

Dening: Joko HN, Surabaya 2008

 

kabeh padha manekung ing punjere urip

embuh apa sing diucapke sajroning ati

malem ganjil, sing dadi seksining alam

aja selak apa kandane suara-suara

 

pilih sugih apa mlarat, pilih luwe apa wareg,

pilih sara apa mulya, pilih ayu apa elek

pilih pangkat apa derajat, pilih mati apa urip

pilih donya apa akerat,

 

kabeh suara-suara keprungu ing langit

ora ana kang bisa nutup-nutupi

ora ana kang ngalang-alangi

ora ana kang gandoli

 

ngucapa, ngucapa, ngucapa

jujura, jujura, jujura

elinga, elinga, elinga

sapa sira sejatine. 

 

——————————————-

 

Geluduk Murka

Dening: Joko HN, Surabaya 2008 

 

ora ngira, ing wayah wengi tanpa mendung,

geluduk jumedar-jumeder gegilani

lintang semburat saparan-paran,

bulan singitan sawalike gunung

iki tandane apa, iki tandane apa,

sasi becik, kok ya ana mahluk murka

ngudal-udal angkuh lan kadigdayane.

 

——————————————-

 

Sarung  Bolong-Bolong

Dening: Joko HN, Surabaya 08 Februari 2009

 

polahe tikus gemlodak

mak blak, mripat mblalak

kelingan apa sing kaenam sajroning impen

wektu iku wis wancine subuh

mbuh apa sing dak pikirne

ning jelas ing awang-awang

sarungku suwek ewek-ewek

luwih omba saka cangkeme kodok

 

e, e, e iku mau lak impen

ya mung kembange wong turu

puspa tajem iku mung  wedarane mpu

ora tak gugu, mandakke ngelu

arepa bolong-bolong, ora dak gagas

amarga ya mung impen ora jelas

 

nanging sakwise sikil jejak bantala

siji mbaka siji, rasane laku kaya ing impen

sak dalan-dalan luh tumetes, nelesi krikil

ora kuat nyangga sirah lan ati

arepa nyebut marang sing gawe urip ya wis kasep

 

sumur padasan wis asat

“duh Gusti nyuwun pangapunten…!”

 

——————————————-

 

Gumoh Omoh-omoh

Dening: Joko HN,  Surabaya 23 Maret 2009

 

saben dina sliwar-sliwer

kulak omongan adol isu,

ngumbar janji, ning  mung ababe thok

ambune penguk, ora tau siwak

uhh…! ora pantes dirungokne

 

petentang-petenteng dum-dum sarung,

embel-embele, mlebuo sarung age-age,

sapa ngerti biso malih dadi omah

yo …iku mau mung umuk, adol gemuk

tiwas neng rai ireng kabeh, ora keduman apa-apa.

 

saikine wis nganggo jas lan dasi,

ethok-ethok mbelo wong cilik,

ning sing kebak mung kanthonge dhewe,

malah, turah-turah nganti gumoh omoh-omoh

huek…huek ! ambune badeg.  

 

——————————————-

 

Banyu

Dening: Joko HN,  Surabaya 22 April 2009

 

aja selak yen asalmu saka lemah

sing mbok pangan ya saka lemah

sikilmu yo ngidak lemah

 

mung siji sing asale saka angkasa

banyu !

lumantaran sumilate srengenge,

munggah ing kayangan, ngadep marang Gustine

madulake kelakuane manungsa 

 

nuli mudhun, lumantaran bun lan udan

ngumbar kabar marang durjana

kang gawe rerusaking bumi 

 

mulane, mulane

aja dumeh akeh kali lan segara

banjur sak penak udele mbuang

sisane nafsu.

 

——————————————-

 

Jumat Legi 

Dening: Joko HN, Solo 24 Oktober 1996

 

Jumat legi

hawa atis

kahanan sepi nyenyet

cahya purnama sumilat

 

Jumat legi

angin sumribit

githok mengkirig

ati tumuju ing cipta

 

Jumat legi

suwaraning manuk dares

tumbal endahing kaweden

anteping donga

 

Jumat legi

sapa sing pengin mantheng ati

aja lena sak liyepan

waspadakna ucaping alam

kanthi dzikir ing raga

 

——————————————-

 

Upa

Dening: Joko HN, Solo 1996

 

upama donya ora ana upa

ora bakal ana mahesa jenar

kang sarwa ijo gadhung

sumping kembang melathi, sasra birawa

lan naga sasra sabuk inten

 

manungsa mung ngelus ati

ngusap bathuk, mburu pusaraning donya

nyingkiri nafsu

 

ora ana jangan bayem

ora ana dendeng celeng

ora ana gelek, udut

 

nanging, upa sarana ucaping dzikir

kanggo nembus cahyane janah 

 

——————————————-

 

Arjuna Kijenan

Dening: Joko HN, Solo 1996

 

lungguh thenguk-thenguk 

sak ngisore cagak listrik

sinambi nyekel udut

lan, nyamikan lelakone urip

 

Arjuna wis kelangan baguse

karebut dening Rahwana

sing wis kelangan siunge

kang katut kauntal dewe 

nalikane guyu lakak-lakak

 

Arjuna satriyaning jagad

wis ora cocok ngabdi pendhawa

“nanging” kandhane atine

“apa ya aku kudu urip melu kurawa?”

 

——————————————-

 

Kidung Bocah Turu

Dening: Joko HN, Solo 1997 

 

tak lela lela lela ledhung

ucapen kanthi landung

supaya tyasing jebeng tan mendung

 

tak lela lela lela ledhung

netra katon saya alum

adem ayem kebak pangarep

 

tak lela lela lela ledhung

sih katresnan tumetes kanthi iklas

tinurut ilining driya

mapak angeting surya

 

——————————————-

 

Rendezvous Solo-Jogja

Dening: Joko HN, Solo 1997

 

ing Solo

sauruting dalan kebak

melathi putih kang isih kuncup

katon sumringah ngumbar esem

binarengan angsluping bakaskara

melathi putih lon-lon mekar

nyebar gandha arum

ngelap sumbaring kringet

 

(jleg!) wengi

Jogja

melathi putih

layu